por
Joaquín Miguel Villa Álvarez
(historiador)
para a Sociedade Filatélica e Numismática Guardesa con motivo do seu 50 Aniversario
Publicado no libro da Exposición EXFIGALICIA 2014
Primer logo da Sociedade.
Na reunión da directiva de Pro-Monte celebrada o
26 de xullo de 1964, así como na memoria anual publicada en agosto, dábase
conta do nacemento desta nova Sección Filatélica, así como dos compoñentes da
súa primeira directiva.[5]
Pola súa banda, na primeira reunión da directiva do Grupo Filatélico Guardés, celebrada o 24 de agosto de 1964, decidíronse xa as liñas
de actuación da nova asociación. Acordouse así a adquisición de libretas para
fixar selos, a subscrición a varias revistas e a petición de ofertas gratuítas
a varias casas nacionais. E estando nese momento emitíndose unha serie
turística acordouse tamén solicitar da Comisión 4ª de Emisións «un selo que
resalte a natural e edénica beleza do Baixo Miño, podendo figurar o Sta. Trega
ou algo que faga referencia histórica, panorámica, etc.». Finalmente decidiuse
a creación dun emblema distintivo para o Grupo Filatélico Guardés, encargándose gustoso de
realizar o bosquexo o vogal Juan Álvarez Sobrino.
O emblema de grupo sería o Monte Santa Trega coroado polo Facho.[6]
Esta primeira reunión, ao igual que tódalas demais, se celebraron no Casino da
Guarda, que era entón o local social da
propia Sociedade Pro-Monte. Iniciábase así a longa presidencia de Francisco
Sobrino Rodríguez que duraría máis de trinta anos,
ata xaneiro de 1996.
II. A
presidencia de Francisco Sobrino Rodríguez
(1964-1996)
Durante os 32 anos da presidencia de Francisco
Sobrino Rodríguez pódense distinguir dúas
grandes etapas: os anos nos que o Grupo Filatélico era unha Sección da
Sociedade Pro-Monte (1964-1981), e os anos posteriores á Pro-Monte (1981-1996).
II.1. O Grupo
Filatélico como Sección de Pro-Monte (1964-1981)
Francisco Sobrino
Rodríguez, primeiro presidente da Sociedade Filatélica
O Grupo Filatélico Guardés,
nacido en 1964 como unha sección da Pro-Monte, e baixo a presidencia de Francisco
Sobrino Rodríguez, amosou nos seus primeiros anos de
vida un grande actividade. Así, na súa segunda reunión celebrada na secretaría
do Casino o 4 de abril de 1965, ademais da integración na Federación
Nacional Filatélica, decidiuse xa acometer un primeiro gran reto: organizar no
verán a primeira exposición filatélica da asociación.[7]
En maio formouse unha comisión organizadora, formada polos directivos Francisco
Sobrino, Alfonso Martínez, Antonio Rodrigo Pantaleón e Ángel Luís Troncoso, a cal puxo mans á obra, contando coa axuda do Grupo
Filatélico de Tui que cedeu os cadros para a mostra. Finalmente, do 1 ao
6 de agosto dese ano 1965 celebrouse nos salóns do Casino da Guarda a 1ª Exposición do Grupo
Filatélico Guardés, que resultou todo un
éxito. O acto inaugural tivo lugar o 1º de agosto, á unha de tarde, en presenza
de autoridades locais e numeroso público. En primeiro lugar bendiciu a
exposición o párroco Francisco Saa Aldir, e despois
fixo uso da palabra o presidente do Grupo Filatélico Francisco Sobrino quen, tras resaltar a importancia do acto, deu por
inaugurado o certame filatélico. Participaron un total de 40 expositores, entre
eles os socios que o desexaron, tendo cada un un
cadro á súa disposición, así como os filatélicos do Grupo Tudense. Premiouse a todos os expositores cun diploma, evitando
así competencias.[8]
Medio ano despois, na reunión da directiva do 12
de febreiro de 1966, aceptouse o convite do Grupo Filatélico Tudense para participar na exposición que ía celebrar en honra a San
Telmo, patrón daquela cidade, baixo o nome de Exfituy'66.
Decidiuse tamén encadernar a revista El Eco Filatélico,
para que estivese mellor presentada e fose máis manexable.[9]
[5] Actas Ordinarias da Sociedade
Pro-Monte Santa Tecla (1954-1964), f. 98; e Sociedade Pro-Monte Santa Tecla (1964), Memoria
anual de la Sociedad Pro-Monte Santa Tecla, Centro de Iniciativas y Turismo de
La Guardia. Ejercicio 1963-1964, Vigo: Gráficas Numen, p. 10.
[6] Libro de Actas do Grupo Filatélico Guardés
(1964-...), p. 4; Exfimiño, nº 3, decembro 2000, p. 4; e Exfimiño,
nº 10, xaneiro 2010, p. 6.
[7] Libro de Actas do Grupo Filatélico
Guardés (1964-...), p. 5; e Exfimiño, nº 4, marzo 2001, p. 5. Tamén
se fixo constar en acta o sentimento do Grupo polo falecemento do presidente
perpetuo da Sociedade Pro-Monte, Julián López Ríos, así como mostrar a súa
condolencia pola desaparición de Agustín Pena Pacheco, o primeiro socio
falecido do Grupo Filatélico.
[8] Libro de Actas do Grupo Filatélico
Guardés (1964-...), pp. 6-8; Exfimiño, nº 5, xuño 2001, p. 6; Exfimiño,
nº 6, setembro 2001, p. 7; e Exfimiño, nº 7, xaneiro 2002, p. 7.
[9] Libro de Actas do Grupo Filatélico Guardés (1964-...), p. 9; e Exfimiño, nº 8, xuño 2002, p. 7. Nesta reunión acordouse tamén que, en ausencia do tesoureiro, pasase a levar as contas o propio presidente.
No hay comentarios:
Publicar un comentario